భావ కవుల గోష్ఠి పంచాంగ శ్రవణంబు
గున్న మావిపైని కోయిలమ్మ
షడ్రుచులను పంచి స్వాగతం పలుకగా
హితము కూర్చ రమ్ము హేవిళంబి
నీతి తప్పి నేతలు అవినీతులవక
అధిక ధరలతోడ జనులు హడలిపోక
ధీర చరితను కలిగిన దేశమందు
సహజ వనరులనుభవించు శక్తినిమ్ము
గతమును తలచుకొనెడు సంగతులు మరచి
నేడు రేపటి సుఖమయ యేడు నెంచి
ఊరువాడయు విహరించు ఊహలందు
కలలు నిజమొంద కదలిరా కల్పవల్లి
మహిని ఆవరించిన పెను మాయలందు
రోజుకో వింతగ తలంచె మోజులెల్ల
శాపగ్రస్త జీవుల మది సంస్కరించి
బ్రతుకు తెరువునిమ్మిక నూత్నవర్షరాజ్ఞి
తెలుగు వెలుగుల లోగిళ్లు తేజరిల్ల
లబ్దిగ బడసె రెండువేల పదునేడు
విమల మతులై చరించుచు విజ్ఞులగుచు
నరులు నిరతము పరువుగ నడవ వలయు.
