శ్రీమ‘దోంకార’ రూపిణి! శ్రీవిరించి
దివ్యరసనాగ్ర వాసిని! భవ్యవేద
శాస్త్ర విద్యాస్వరూపిణి! జ్ఞానదాత్రి!
‘‘విశ్వ కళ్యాణవాణి’’కి - విరులజోత!!
‘మాఘశుద్ధ పంచమి’ - శుభ మంగళకర
పర్వమున ప్రభవించిన - పంకజభవు
రాణి- సత్య సుందర శివరమ్యగాత్రి-
‘‘స్వర్ణహంసవాహిని’’కి - శ్రీచందనమ్ము!!
అక్షర పరమేశ్వరి! శ్రీకరాభయాక్ష
దామ- పుస్తక-వీణ -పద్మ శుభపాణి!
ధవళ వస్త్రధారిణి! శారదాంబ! దివ్య
సత్యలోక విహారిణీ! శరణు! శరణు!
‘ఆర్ష మునీంద్రుల’ - హృదయాల వేదపు-
రాణ సుధలనింపు -రమ్యవాణి!
‘వాల్మీకి’లో దివ్య భవ్యరామాయణ-
గంగ పొంగించిన - కమ్రవాణి!
‘వ్యాసమహర్షి’చే - ‘‘బాసర’’లో కొలు
వైన - ‘సరస్వతి’ - జ్ఞానవాణి!
కాళిదాస -తులసి - కంబ- నన్నయ - పోత
నన్నమయ్యల భక్తి - అమృతవాణి!
భవ్య ‘‘కాశ్మీర’’ - ‘‘శృంగేరి’’ - దివ్యపీఠ
ముల - సువర్ణకాంతు లెసగ - కొలువు తీరి
నట్టి - ‘‘అక్షర శ్రీవాణి’’! అఖిల లోక
వందిత చరణీ! కళ్యాణి! వందనమ్ము!!
పలక- బలపము; పుస్తక కలములుంచి-
‘‘ఓం సరస్వతీ దేవ్యైనమః’’ - సభక్తి
కముగ పూజించు - బాలల కరుణ తోడ
జ్ఞాన ధనులుగ తీర్చుమో - ‘‘శారదాంబ’’!!
జ్ఞాన విద్యాకళాశ్రీ లొసంగి మమ్ము-
కరుణ పాలించు- ‘‘కళ్యాణ కల్పవల్లి’’!!
‘‘వేద కళ్యాణి! వాణి!’’ దీవించుమమ్మ!
‘‘పసిడి పలుకులమ్మా’’! నీకు ప్రణతులమ్మ!!!
