డా।। బోయ జంగయ్య నవల జగడం మీద సిద్ధాంత గ్రంథమే డా।। తాళ్లపల్లి యాకమ్మ రచించిన ఈ జగడం - ఒక పరిశీలన. జగడం నవలా నాయకుడు రాజం దళితులకు కావలసింది గుడి కాదు బడి అంటాడు. అసలు ఈ జగడం ప్రధాన జీవన స్రవంతికి దూరంగా దళితులను నెట్టేయడం గురించే అని విశ్లేషిస్తారు రచయిత్రి. చక్కని శైలితో చదివింపచేస్తుందీ పొత్తం. 

- మందరపు హైమవతి

భగవద్గీతకు ఎన్నో భాష్యాలు, వ్యాఖ్యా నాలు అందుబాటులో ఉన్నాయి. తెలుగులో 745 శ్లోకాల సంపూర్ణ శ్రీమద్భగవద్గీతను వ్యాఖ్యాన సహితంగా అందుబాటులోకి తెచ్చారు కె.వి.ఎస్‌.రావు. ‘శృతి విప్రతి పన్నాతే యదా స్థాస్యతి నిశ్చలా।/ సమాధావచలా బుద్ధిస్తదా యోగమ వాప్స్యసి।।’ రకరకాల బోధలు విని కలత చెందకుండా భగవంతునిపై ధ్యాసఉంచితే ఆత్మ సాక్షాత్కరిస్తుందని విపులంగా రాశారు. ఆధ్యాత్మిక చింతన గలవారి కర దీపిక ఈ పొత్తం.  

- జయదేవకి

భావకవిత్వపు పదాలతో దండమూడి శ్రీచరణ్‌ రాసిన గవేషణలో నూట ఏడు కవితలతో పాటు నాలుగు ప్రేమలేఖలు ఉన్నాయి. అక్షరాలను వెలిగించిన ‘ఆత్మావిష్కరణ’, యుగాలనాటి వారసత్వాన్ని తెలిపే ‘మానుష వేదం’, రుధిర ధారల సరాగం ‘తృష్ణ’, తలపుల సవ్వడి ‘త్వమేవ శరణం’, విశ్వమంత ఆలోచనల్ని నిక్షిప్తం చేసిన ‘చివరి వాక్యం’ లాంటి చక్కని, చిక్కని కవితలెన్నో పాఠకులను ఆకట్టుకుంటాయి.  

- జి.శ్రీనివాస్‌

సామాజికాంశాలను చొప్పిస్తూ 27 కథలతో డా।। లక్ష్మీ రాఘవ రాసిన కథల పొత్తమే మనసుకు చికిత్స. ఇందులో ఎంతైనా అమ్మ కదా!, మలివయసులో ప్రేమలేఖ, దొరకనిది, మాతృహృదయం, సర్దుబాటు, పిల్లలమనసు, అత్తగారికో లేఖ లాంటి కథలన్నీ మనసుకు హత్తుకుంటాయి.     

- జయ

భాషలను సులభతరం చేయాలనేఉద్దేశంతో చక్కా చెన్నకేశవరావు 5 భాషలు 5 వారాలు పొత్తాన్ని రాశారు. ఇందులో ఇంగ్లీషు, హిందీ, తమిళం, కన్నడం, మలయాళం  తెలుగులోనే సరళంగా నేర్చుకునేలా రూపొందించారు. విద్యార్థులకు, భాషలు నేర్చుకునేవారికి ఉపయుక్తం.

- రజని

ఆదిత్యుని గురించి వివరిస్తూ నూతలపాటి వెంకటరత్నశర్మ రాసిన పద్యకావ్యమే సూర్యచరితము. ఇందులో సూర్యుని జననం మొదలుకుని లోకపాలన వరకు, అలాగే తెలుగింటి ఆచార వ్యవహారాలు, 12 మాసాల్లో సూర్యుని గమనాలను 312 గద్యపద్యాల్లో చక్కగా వర్ణించారు.

- దేవకి

ఆకాశవాణిలో ప్రసారమైన సుధామ ప్రసంగాలనే తెలుగు సొగసులుగా పుస్తక రూపంలో తెచ్చారు. ఇందులో జంటపదాలు, రూఢివాచకాలు, ప్రత్యయాలు, పర్యాయ పదాలు, ప్రాసాక్షరాలు, ఊతపదాల గురించి విస్తృత వ్యాసాలున్నాయి. విద్యార్థులకు ఈ పొత్తం ఉపయుక్తం.     

- రమేశ్‌

వర్తమానంలో వస్తు వ్యామోహం, వినియోగ సంస్కృతి, వెర్రితలలు వేసి ఎన్నో సమస్యలకు కారణమవుతున్నాయి. మానవ సంబంధాల్ని నిలబెట్టుకోవాల్సిన బాధ్యత సమాజంలోని వ్యక్తులందరిపైనా ఉంది. చలన చిత్రాలు, వార్తలు, సామాజిక ఘటనల నేపథ్యంలోంచి మానవీయ కోణాల్ని స్పృశిస్తూ ప్రముఖ వారపత్రికలో ధారావాహికగా ప్రచురితమైన 26వ్యాసాల సంపుటి బంధాలు-అనుబంధాలు. ఉన్నత విలువల ఆలంబనగా, జీవిత సోపానాల్లో ఉన్నత స్థానాలకు చేరిన వారి వ్యక్తిత్వాల్ని కొన్ని వ్యాసాలు వివరించి చెబుతూ స్ఫూర్తిగా నిలుస్తాయి. పత్రికల వార్తల ఆధారంగా కొన్ని జీవిత లోతుల్ని విశ్లేషించడంతో ఆ వ్యాసాలకు పువ్వుకు తావి అద్దినట్లయింది. మానవ జీవన పార్శ్వాల్ని సరిగా అర్థం చేసుకుని, బతుకును అర్థవంతంగా, ఆదర్శమయంగా తీర్చిదిద్దుకోవడానికి ఈ వ్యాససంపుటి కరదీపిక.

- అనిసెట్టి శాయికుమార్‌

భాష సరిహద్దులు దాటి విస్తరిస్తున్న కొద్దీ శక్తిమంత మవుతుందనీ, మారుతున్న కాలంతో పాటూ తెలుగు మరింత సాంకేతిక పదజాలాన్ని సృష్టించుకోవాలనీ, రాజకీయ శక్తిగా ప్రభావం చూపుతున్న తెలుగు భాషకు నేడు ప్రతిబంధకంగామారుతున్న అంశాలను ప్రస్తావిస్తూ డా।। పొత్తూరు రంగనాయకులు విశ్వభాష తెలుగు వినుర వేమా పేరిట చిరుపొత్తాన్నివెలువరించారు. వైజ్ఞానికభాషగా తెలుగునితీర్చిదిద్దేందుకు, విద్య, వాణిజ్య, కళారంగాలను ప్రభావితం చేస్తూ విస్తరించేందుకు, పనిమంతుల భాషగా విశ్వభాషల సరసన నిలిచేందుకు ఎలాంటి సాధన సంపత్తి అవసరమో విశ్లేషిస్తూ చేసిన ప్రతిపాదనలు భాషోద్యమకారులకు, భాషాపరిశోధకులకు, సరికొత్త ఆలోచనల ద్వారాలు తెరుస్తాయి. నిఘంటువు నిర్మాణంలో ఆధునికత, సాంకేతిక పదజాలాన్ని అభివృద్ధి పరచుకోవడంలో నిబద్ధత గురించిన వ్యాసాలు ఇందులో ఉన్నాయి. 

- కన్నీడి మనోహర్‌