ఒక రచయిత ‘కలంప్రయాణం’

రచయిత: మల్లాది వెంకట కృష్ణమూర్తి; పుటలు: 758; వెల: Rs600; ప్రతులకు: గోదావరి ప్రచురణలు, 7-154, కొత్త కాలనీ, ఆరట్లకట్ట, కరప, తూ.గో.-533016, 95530 84268

ఒక రచయిత ‘కలంప్రయాణం’

నూటా ఆరు నవలలు, మూడువేలా అయిదు వందలకు పైగా కథలు, పన్నెండు వందల వ్యాసాలూ.. 22 సినిమాలు, మరెన్నో ట్రావెలాగులు, పిల్లల పుస్తకాలు... యాభై ఏళ్ల రచనా కాలంలో మల్లాది వెంకట కృష్ణమూర్తి సాధించిన ఘనత ఇదీ! తన నూటా ఆరు నవలలకు సంబంధించిన కథావస్తువులు, వాటికి ప్రేరణ? ఏ నవల కోసం ఎంత పరిశోధించారు తదితర వివరాలతో వచ్చిందే ఈ నవల వెనుక కథ. ఆ నవలలు ఏయే పత్రికల్లో వచ్చాయి, ఆ సంపాదకులతో తన అనుభవాలు, సినిమా కథా చర్చల విశేషాలూ వెల్లడించారు. తన వ్యక్తిగత జీవితంలో వచ్చిన మార్పు,  ఆధ్యాత్మికత వైపు పయనించిన వైనం.. ఏదీ దాచకుండా నివేదించారు. ప్రచురణ రంగంలోకి ఎందుకు రావాల్సి వచ్చింది? అందులో ఎదుర్కొన్న సాధకబాధకాలు  చెప్పారు. ఏడు వందల పేజీలైనా శైలి పరుగులు పెట్టిస్తుంది.

- చంద్ర ప్రతాప్‌ 

ధైర్యంగా సాగాల్సిన ‘తోవ’

రచయిత: కొండవీటి మధుసూదన్‌ రెడ్డి; పుటలు: 269; వెల: Rs220; ప్రతులకు: రచయిత, డో.నం. 6-124/1, పోచంపల్లి రోడ్డు, బీబీనగర్‌ పోస్టు, యాదాద్రి భువనగిరి జిల్లా, 80081 28800

ధైర్యంగా సాగాల్సిన ‘తోవ’

విద్యార్థి ఉద్యమాల నుంచి పత్రికారంగం మీదగా పయనించి విద్యారంగంలో విశేష కృషి చేస్తోన్న కొండవీటి మధుసూదన్‌ రెడ్డి తెలుగు పాఠకులకు చూపుతున్న తోవ ఇది! ఇందులో చిన్నవీ పెద్దవీ కథానికలు, వ్యక్తిత్వ వికాస వ్యాసాలు అన్నీ కలిపి నలభై ఉన్నాయి. పలు పోరాటాలు, ఉద్యమాల్లో రాటుదేలిన రచయిత, నిరాశా నిస్పృహలు వీడి నిర్మాణాత్మక ఆలోచనలతో ముందుకు సాగాలని ప్రతి రచనలో పిలుపునిచ్చారు. సందేశాత్మకంగా తన అనుభవాలను అక్షరీకరించిన వైనం ఆకట్టుకుంటుంది. కరోనా సృష్టించిన కలకలం నిర్భాగ్యుల జీవితాలను ఎలా దుర్భరం చేసిందో, వారికి సామాజిక సహకారం ఎలా అందిందో వివరిస్తూ అందరి బాధ్యతలు గుర్తు చేయడం విశేషం. వాస్తవాలు విస్మరించకుండానే పాత్రికేయ శైలీ విన్యాసాలతో జీవితం పట్ల విశ్వాసం, గౌరవం పెంచేలా సాగే రచనల తోరణమిది.

- సవనక్రాంత్‌

వీరశిలల మహబూబ్‌నగర్‌

రచయిత: కొమ్మగాని శీనయ్య; పుటలు: 112; వెల: Rs100; ప్రతులకు: కొమ్మగాని వాణి, 1-48/4/సి1, శ్రీవాణీ నిలయం, రాధాకృష్ణ కాలనీ, కల్వకుర్తి, నాగర్‌కర్నూలు జిల్లా-509324, 94401 18718

వీరశిలల మహబూబ్‌నగర్‌

ఎం.ఫిల్‌ పట్టా కోసం కొమ్మగోని శీనయ్య రాసిన లఘు సిద్ధాంత గ్రంథం ఉమ్మడి మహబూబ్‌నగర్‌ జిల్లా వీర శిలలు పరిశీలన. ఉపోద్ఘాతం, ఆత్మార్పణ, వీరశిలలు, వీరశిలా శాసనాలు - శిల్పాలు, ముగింపుతో కలిపి 5 అధ్యాయాలుగా రచించారు. ప్రాచీన కాలం నుంచి వీరశిల, స్మారకశిల వేయించడం ఆనవాయితీ. దక్షిణ భారతదేశం వీరశిలలకు ప్రసిద్ధి. ఆంధ్రప్రదేశ్‌లో కడప జిల్లా గంగపేరూరులోని వీరశిలా శాసనం 3వ శతాబ్దానిదని అన్నారు. మహబూబ్‌నగర్‌ జిల్లా వీరశిలలకు చరిత్రలో ప్రాధాన్యత ఉందని, వీరశిలలు శాసనాలలో భాగమని చెబుతూ, వీటిని ఏ సందర్భాల్లో ఏర్పాటు చేస్తారో, ఏ ఆకారాల్లో ఉంటాయో, స్మారక శిలలు, వీరశిలల మధ్య వ్యత్యాసాలేంటో పేర్కొన్నారు. ఈ సిద్ధాంత గ్రంథం చరిత్ర - సంస్కృతి, పురావస్తు విభాగానికి చెందిందైనా సాహిత్యానికి దగ్గరగా ఉండటం విశేషం. 

- ఎలగందుల సత్యనారాయణ

ఒక సంస్థ భాషా సేవ

రచయిత: డా।। ఎం.శ్రీనివాసులు, పుటలు: 278: వెల: Rs300: ప్రతులకు: రచయిత,ఇం.నెం. 1-67,బోయిన్‌పల్లి గ్రామం, మిడ్జిల్‌ మండలం,  మహబూబ్‌నగర్‌ జిల్లా, 9491388662

ఒక సంస్థ  భాషా సేవ

ప్రపంచీకరణ ప్రళయంలా వ్యాపిస్తున్న ఈ కాలంలో స్థానిక భాషలు, సంస్కృతి, సంప్రదాయాలను కాపాడుకోవడం ఎంతో అవసరం. తెలుగు రాష్ట్రాల్లో అందుకు విశేషంగా కృషి చేసిన, చేస్తున్న ‘ఆంధ్ర సారస్వత పరిషత్తు (ప్రస్తుత తెలంగాణ సారస్వత పరిషత్తు) తెలుగు భాషా సాహిత్య సేవను పొత్తం రూపంలో తెచ్చారు. 1943 మే 26న అవతరించిన ఈ సంస్థ చేసిన భాషా సేవతో పాటు నిజాం పాలన నాటి చట్టాలు, తెలుగుభాష ఎదుర్కొన్న సవాళ్లును వివరించారు. ఆంధ్రోద్యమాలు, ఆంధ్రమహాసభ అవతరణ, సమావేశాల సమాచారం, భాషాభివృద్ధి కోసం సంస్థ ప్రచురించిన ‘ఆంధ్రుల సాంఘిక చరిత్ర, సాహిత్య సోపానాలు, ఆంధ్రమహాభార తోపన్యాసాలు’ లాంటి గ్రంథాల వివరాలు ఇందులో వివరంగా అందించారు. విస్తృత విషయ సేకరణ, విశ్లేషణ ఈ పొత్తంలో  పొందికగా అమరాయి.

-  వై.ఎల్‌.వి.ప్రసాద్‌

పోతన కవితా రసార్ణవం

రచయిత్రి: డా.పి.యశోదారెడ్డి: పుటలు: 122: వెల: Rs60: ప్రతులకు: తెలంగాణ సాహిత్య అకాడమీ, కళాభవన్, రవీంద్ర భారతి హైదరాబాదు 500004, 040-29703142 

పోతన కవితా  రసార్ణవం

వ్యాస భాగవత పురాణాన్ని తెలుగు చేస్తూ పోతన చేసిన రచనలో భక్తి మార్గ ప్రసంశ అధికం. శబ్దాలంకారాలతో అలతి అలతి తెలుగు పదాల సొగసుతో అలరారే ఈ భాగవతంలో క్లిష్టమైన అంశాలూ లేకపోలేదు. అలా కష్టమైన 108 పద్యా లను ఎంచుకుని, వాటికి సరళ వ్యాఖ్యానం రాస్తూ యశోదారెడ్డి పోతన కవితాసుధను వెలువరించారు. పోతన పద్య మకరందాల సొగసును ఇప్పటి పాఠకులకు అందించ డానికి తెలంగాణ సాహిత్య అకాడమీ దీన్ని పునర్ముద్రించింది.   

- బుద్ధ

గురువుగారి జ్ఞాపకాలు

రచయిత: సన్నిధానం నరసింహశర్మ: పుటలు: 152: వెల: Rs100: ప్రతులకు: నవోదయ, విశాలాంధ్ర కేంద్రాలు, హైదరాబాదు. అజో-విభొ- కందాళం ఫౌండేషన్, 040 64512224

గురువుగారి జ్ఞాపకాలు

ప్రముఖ రచయిత సన్నిధానం నరసింహ శర్మ తన గురువైన మధునాపంతుల జ్ఞాపకాలను తలచుకుంటూ రాసిన మధు స్మృతి ఇది. ‘రాజమహేంద్రవరం- సాహితీ నేపథ్యం’ వ్యాసంలో ఆ కాలపు సాహిత్యావ రణాన్ని స్మరించారు. ఈ పొత్తంలో రచయిత, మధునాపంతుల జీవనరేఖలను తడిమారు. ఆయనతో ఆరుద్ర, శరభయ్యల సాహితీ చర్చల వైభవాన్ని గుర్తుచేశారు. మధునాపంతులకు సమకాలికులైన సాహితీవేత్తల ప్రస్తావన ఈ పుస్తకమం తటా పరచుకుని ఉంటుంది.    

- కేఎం

వంద గజళ్ల విందు

రచయిత: తుమ్మూరి రాంమోహన్‌రావు: పుటలు: 137: వెల: Rs150: ప్రతులకు: రచయిత, ‘ఉషారామం’, రాయంచ అవెన్యూ, పిర్జాదీగూడ, ఉప్పల్, హైదరాబాదు-98, 97015 22234

వంద  గజళ్ల విందు

మాత్రాగణ బద్ధమైన గేయ కవితా ప్రక్రియ గజల్‌. ఈ మహెఫిల్లో కోయిల సంకలనంలో వంద గజళ్లున్నాయి. జీవిత నిర్వచనం, ప్రబోధం, ప్రణయం, సంస్కరణ, మాతాపితల స్తుతి, దేశభక్తి తదితరాలు కవితా వస్తువులు. మూడోవంతు కవితలు ప్రణయానికి సంబంధించినవే. ‘‘మనిషి మనిషిని మనీషిగ మార్చు కవితా క్రతువులో/ మనసులను మాలిన్యరహిత మొనర్చునది ఈ నా గజల్‌’’ అంటారు కవి. గజల్‌ప్రేమికులను ఆకట్టుకునే పుస్తకమిది.

- ఆచార్య

బోధన ఇలా..!

రచయిత్రి: వై.మాలతీక్రుష్ణ, పుటలు: 40, వెల: Rs25, ప్రతులకు: అభ్యాస విద్యాలయం, గంగిరెద్దుల దిబ్బ, విజయవాడ, 9440579922 
 

బోధన ఇలా..!

బోధన.. అంటే పిల్లలకు ఆసక్తి కలిగించేలా ఉండాలి. పఠనం, కథనం, శ్రవణం, దృశ్య మాధ్యమం, కాస్త చమత్కారం, అభినయాలతో చేసిన బోధన చిన్నారుల మనసులో నాటుకుపోతుంది. వాళ్లు ఆనందంతో మనసుపెట్టి వింటారు కూడా! అనుభవాల ద్వారా తెలుగు నేర్పుదాం ఇలా..! అంటూ వచ్చిన ఈ పుస్తకం బోధనా మెలకువలను అందిస్తుంది. ఉపాధ్యాయుల అనుభవాల ఆధారంగా చేసిన సూచనలన్నీ తరగతి గదిలో ఉపయుక్తమయ్యేవే.      

- తులసీబృంద

కవితా దర్పణంలో ఓ దశాబ్దం

సంపాదకులు: డా.పెళ్లూరు సునీల్, సుంకర గోపా లయ్య, దోర్నాదుల సిద్దార్థ: పుటలు:70: వెల:Rs30: ప్రతులకు: సుంకర గోపాలయ్య, తెలుగు శాఖాధి పతి, పీఆర్‌ కళాశాల, కాకినాడ, 94926 38547

కవితా దర్పణంలో ఓ దశాబ్దం

డా।। రాధేయ సృష్టించిన శిష్య కవిత్రయం సునీల్, గోపాల్, సిద్ధార్ధ. ఈ ముగ్గురూ ప్రారంభించిందే రాధేయ కవితా పురస్కారం. 2010 నుంచి 2019 వరకు  ఈ పురస్కారాన్ని అందుకున్న 24 మంది కవుల కవితల సంకలనమే దుఃఖపోగుల నేత. ఈ కవితలన్నీ గడచిన దశాబ్దంలోని భారతీయ సామాజిక వాస్తవికతను ప్రతి బింబిస్తాయి. ప్రాకృతిక వనరుల విధ్వంసం నుంచి మానవ సంబంధాల్లోని ఆటుపోట్ల వరకూ అనేక అంశాల మీద వచ్చిన విశిష్ట కవితల మాలిక ఇది.      

 - భ్రమరాంబ

bal bharatam