తెలుగుకి వెలుగు రామోజీరావు

  • 621 Views
  • 1Likes
  • Like
  • Article Share

    మానుకొండ నాగేశ్వరరావు,

  • ప్రధానాచార్యులు, ఈనాడు జర్నలిజం స్కూలు,
  • హైదరాబాదు.
  • 8008001800
మానుకొండ నాగేశ్వరరావు,

కొందరికి అవార్డులు విలువ తెస్తాయి. కొందరు అవార్డులకే విలువ తెస్తారు. తెలుగు వారందరికీ సూర్యోదయానికి ముందే శుభోదయం పలికే ఈనాడు వ్యవస్థాపకులు రామోజీరావు రెండో కోవకు చెందుతారు. జనవరి 25వ తేదీన ఆయనకు పద్మవిభూషణ్‌ ప్రకటించినప్పుడు ఆనందపడిన వారెంతమందో, ఆశ్చర్యపోయినవారూ అంతేమంది ఉన్నారు... ఈ అవార్డు ఇంతవరకూ రాలేదా అని. అవును, ఆయనకి పద్మ అవార్డులు ఇంతకుముందే వచ్చి ఉంటాయని భావించేవారే ఎక్కువ. ఎప్పుడో రావాల్సిన పురస్కారాలు ఇన్నాళ్లు ఆలస్యం కావడం ఆశ్చర్యమే మరి.
      రామోజీరావు పేరు వింటేనే తెలుగువారందరికీ ఒక స్ఫూర్తి. తెలుగునాట ఆయన ముద్రలేని రంగం లేదు. ఆయన ప్రభావం పడని వూరూ వాడా లేవు. తెలుగువారికీ, తెలుగునేలకీ ఆయన చేసిన, చేస్తున్న సేవ చరిత్రలో శాశ్వతంగా నిలుస్తుంది. తెలుగు పత్రికారంగంలో గ్రాంథిక వాసనల్ని తుదకంటా తుడిచిపెట్టి ప్రజల భాషకి పట్టం కట్టింది ఆయన సంపాదకత్వంలోని ఈనాడే. అచ్చ తెలుగు పదాలు, నుడికారాలు, తీరైన వాక్యాలు ఈనాడు భాషాసిరులు. పదో తరగతి చదవని వారికి కూడా ఈనాడు వార్తలు అరమరికల్లేకుండా అర్థమవుతాయి. శీర్షిక ఆకర్షణీయంగా ఉండి పాఠకుణ్ని వార్తలోకి లాక్కెళ్లాలనేది రామోజీరావు ధోరణి. ‘తెలుగుదేశం సూపర్‌హిట్‌’ (1983లో తెలుగుదేశం పార్టీ మొదటిసారి గెలిచినప్పటి పతాక కథనం. ఈ శీర్షికని పెట్టింది కూడా ఆయనే), ‘జనమా బంతిపూల వనమా!’, ‘హితులారా... ఇక సెలవు!’, ‘చేసింది చాలు.. గద్దెదిగు లాలు’, ‘మామూళ్లు ఇవ్వకుంటే నూరేళ్లు నిండినట్లే’ వంటి ఈనాడు తరహా శీర్షికలు అలాంటివే. ఇవి పాఠకులకు చిరకాలం గుర్తుండిపోతాయి. తెలుగు భాష చెక్కుచెదరకుండా ఉండటానికి, సగౌరవంగా నిలవడానికి రామోజీరావు ప్రధాన కారకులని రాబోయే తరాలు చెప్పుకొనేటట్లుగా ఆయన తెలుగు జాతినీ, భాషనీ ప్రభావితం చేస్తున్నారు.
      తెలుగుభాష పూర్తిగా ఆంగ్లమయం అవుతున్న తీరు ఆయన్ని కలచివేస్తోంది. తను ప్రాణ సమానంగా భావించే ఈనాడులో ఆంగ్లాన్ని పూర్తిగా పరిహరించాలని కంకణం కట్టుకున్నారు. పత్రికలోనూ, ఈటీవీ వార్తల్లోనూ ఆంగ్లపదాలు దొర్లకుండా కట్టడిచేసి భాషకి ప్రాణం పోస్తున్నారు. ఈ క్రమంలో వందలకొలది తెలుగుపదాలు జనించాయి. సంపాదకబృందంలో పనిచేసే ప్రతి ఒక్కరూ పద సృష్టికర్త అయ్యారు. దస్త్రం (ఫైల్‌), బిందుసేద్యం (డ్రిప్‌ ఇరిగేషన్‌), గుత్తేదారు (కాంట్రాక్టర్‌), మేఘమథనం (క్లౌడ్‌ సీడింగ్‌), శతకం (సెంచరీ) వంటి పదాలు; ఐకాస (జె.ఎ.సి.), అనిశా (ఎ.సి.బి.), తెదేపా (టి.డి.పి.), తెరాస (టి.ఆర్‌.ఎస్‌.), తితిదే (టి.టి.డి.) వంటి సంక్షిప్త రూపాలు చాలావరకు ఈనాడు, ఈటీవీల్లో పుట్టినవే. కాదంటే ఈనాడు, ఈటీవీల ద్వారా బహుళ ప్రచారంలోకి వచ్చినవే. బల్దియా (మున్సిపల్‌ కార్పొరేషన్‌), లష్కర్‌ (సికింద్రాబాద్‌) గల్లీ (వీధి), ముక్కాలు (ముప్పావు) వంటి మాండలిక పదాల్ని కూడా ఈనాడు, ఈటీవీలు ప్రాచుర్యంలోకి తెచ్చాయి.
భాషాసేవకుడు
ఈ కృషికి కొనసాగింపుగా ఆవిర్భవించిందే రామోజీ ఫౌండేషన్‌. మీరు చదువుతున్న ఈ ‘తెలుగువెలుగు’ పత్రిక ఆ ఫౌండేషన్‌పై వెలసిన సౌధమే. భాషా సేవకులు, ప్రేమికులు, అభిమానుల ఆకాంక్షల్ని ఒక చోటకు చేర్చి తెలుగు భాషకి వైభవం తీసుకురావాలన్న లక్ష్యంతో 2012లో రామోజీరావు తెలుగు వెలుగు ప్రారంభించారు. తెలుగుభాష ఎంత ప్రాచీనమైనదో, అంత అధునాతన లక్షణాలు కలిగిందని ఆయన నమ్ముతారు. ఎలాంటి భావాల్ని అయినా వెలిబుచ్చడానికి, శాస్త్ర సాంకేతిక పరిజ్ఞానాన్ని పంచడానికి, సంగీత సాహిత్యాల్ని సృజించడానికి తెలుగు ఎంతో అనుకూలమైనా, తెలుగు మాధ్యమంలో చదువులు సాగకపోవడం వల్లే తెలుగుజాతికి ఈ దురవస్థ అంటారు. ఆయన దృష్టిలో... మాతృభాషని మరచిపోయిన జాతికి మనుగడ లేదు. మాతృభాషని విస్మరిస్తే మేధోవికాసం ఉండదు. సృజన వెల్లివిరియదు. అందుకే చిన్నారుల్లో తెలుగు భాషానురక్తిని పెంచడానికి ‘బాలభారతం’ పత్రికనూ ప్రారంభించారు. తెలుగులో బాల సాహిత్యంలో ఎంత కొరత ఉందో బాలభారతం పత్రికకు లభిస్తున్న ఆదరణని చూస్తే తెలుస్తుంది. ప్రామాణికమైన నిఘంటువుల్ని ప్రచురించడానికి, అందరికీ ఉపయోగపడే ఒక బృహత్‌ గ్రంథాలయం ఏర్పాటుచేసి అంతర్జాలం ద్వారా సేవలందించడానికి ఫౌండేషన్‌ కృషి చేస్తోంది. పూర్వీకులు మనకు అందించిన తెలుగు భాషా సంస్కృతులకి అదనపు సొగసులద్ది తర్వాతి తరాలకు భద్రంగా అందించాలనేది ఆయన స్వప్నం.
తెలుగుభాష అంటే అభిమానంతోనే తన రెండో కుమారుడు సుమన్‌కి కొండవీటి వెంకటకవి గారితో ఏడేళ్లపాటు శిక్షణ ఇప్పించారు. మనవరాళ్లు, మనవడితో తెలుగులోనే మాట్లాడతారు. ఒక్క ఆంగ్లపదం దొర్లకుండా తెలుగులో మాట్లాడాలని వారితో పోటీపెట్టుకోవడం ఆయనకు అలవాటు.
      హైదరాబాదులో రామోజీ ఫిల్మ్‌సిటీ నిర్మాణం కావడం తెలుగువారికి ఎంతో ప్రాచుర్యాన్నీ, గుర్తింపునీ తెచ్చింది. ఇది ప్రపంచంలోనే అతి పెద్ద సినిమా నిర్మాణ కేంద్రంగా గిన్నిస్‌ బుక్‌లో నమోదైంది. దేశంలో అన్ని భాషల సినిమాలూ ఇందులో నిర్మాణమవుతున్నాయి. ఇక్కడికి రాని భారతీయ సినీ ప్రముఖులు లేరు. ఏడాదికి సగటున 13 లక్షల మంది పర్యాటకులు ఫిల్మ్‌సిటీని సందర్శిస్తున్నారు. ఉర్దూ నుంచి కన్నడం వరకు, గుజరాతీ నుంచి బంగ్లా వరకు ఎన్నో ప్రాంతీయ భాషల్లో టెలివిజన్‌ ఛానళ్లను తెలుగునేలపై ఆవిష్కరించడం భాగ్యనగరానికీ ఎనలేని కీర్తి తెచ్చిపెట్టింది. దేశవ్యాప్తంగా ప్రతిభావంతులు, సృజనశీలురు, రచయితలు వీటిలో పనిచేయడానికి హైదరాబాదు వచ్చారు. రామోజీ ఫిల్మ్‌సిటీలోని ఈటీవీ భవనం ఒక మినీ పార్లమెంట్‌ లాగా ఉంటుంది. వనస్థలిపురం, దిల్‌సుఖ్‌నగర్‌, ఉప్పల్‌ వీధుల్లో ఇంతమంది ఇతర భాషలవారు నివాసం ఉండటం ఆయన స్థాపించిన సంస్థల ఫలితమే.
100% పాత్రికేయుడు
రామోజీరావు బహుముఖ ప్రజ్ఞాశాలి. పారిశ్రామికవేత్తగా, పత్రికా సంపాదకుడిగా, స్టూడియో వ్యవస్థాపకునిగా, సినీ నిర్మాతగా, వ్యాపారవేత్తగా ఎన్నో రంగాల్లో రాణించారు. అన్నింటిలోకి జర్నలిజమే ఆయనకు అమితంగా ఇష్టమైనది. రోజులో ఎక్కువ సమయం దీనికే కేటాయిస్తారు. వర్తమాన వ్యవహారాల్ని ఆయన నిశితంగా పరిశీలిస్తారు. తెలుగు నుడి, పద ప్రయోగం, వాక్యనిర్మాణంపై ఆయనకు పట్టు ఎక్కువ. చెప్పాల్సిన విషయం అక్షరాల్లో నూరుశాతం ప్రతిబింబించేంత వరకు ఆయన పట్టు విడవరు. సంపాదకుడు అంటే ఆయనే. న్యూస్‌ ప్లానింగ్‌, న్యూస్‌ జడ్జిమెంట్‌ రామోజీరావు నుంచే నేర్చుకోవాలి. ఈనాడు ఇన్ని విజయ శిఖరాలు చేరడానికి తనలోని పాత్రికేయుడే ప్రధాన కారణం. ఎడిటర్స్‌ గిల్డ్‌ ఆఫ్‌ ఇండియా ఛైర్మన్‌గా కూడా రామోజీరావు పనిచేశారు. ఆ పదవికి అందరికన్నా ఆయనే ఎక్కువ అర్హులు.
      1989లో ఈనాడు జిల్లా పత్రికల ఆవిష్కరణ రామోజీరావు తీసుకున్న సాహసోపేతమైన నిర్ణయం. ఇవి స్థానిక వార్తలకు పట్టంగట్టి తెలుగునాట జర్నలిజం రూపురేఖల్ని మార్చివేశాయి. సామాన్యుల ఆకాంక్షలకు అద్దం పట్టాయి. పాలనలో పారదర్శకతకు తలుపులు తెరిచాయి. జిల్లా పత్రికల వల్ల కొత్త తరం నాయకులు ప్రాచుర్యంలోకి వచ్చారు. అనుకరణే అత్యుత్తమ ప్రశంస అన్నట్లుగా దేశంలోని దాదాపు అన్ని భాషల పత్రికలూ కాలక్రమంలో ఇదే పంథాను అనుసరించడం ఆయన ముందుచూపునకు తార్కాణం.
రామోజీరావు సంపాదకత్వంలో నడిచే ‘అన్నదాత’ దేశంలోనే అగ్రగామి వ్యవసాయ మాసపత్రిక. 1969లో దీనిని ప్రారంభించారు. ఆయన ప్రారంభించిన మొదటి పత్రిక ఇదే. వ్యవసాయ కుటుంబం నుంచి వచ్చిన ఆయనకు రైతులంటే ఎంతో అభిమానం. అన్నదాతల మేలుకోసం ఈనాడు దినపత్రికలో సైతం ‘రైతేరాజు’ శీర్షికని ప్రవేశపెట్టారు. ఈ వ్యాసాల్ని రైతులు మాట్లాడుకొనే భాషలో ఇవ్వడం వల్ల వారి ఆదరణకు పాత్రమైంది.
ప్రయోగాల ప్రేమికుడు
      రామోజీరావుది మొదటి నుంచీ వినూత్న శైలి. 1978లోనే ‘విపుల, చతుర’ సాహిత్య పత్రికల్ని ప్రారంభించడం ఇందుకొక ఉదాహరణ. ప్రపంచ భాషల్లోని అత్యుత్తమ కథల్ని అనువదించి తెలుగువారికి అందించడానికి ఆయన ‘విపుల’ పత్రిక ప్రారంభించారు. ఇలాంటి ప్రయత్నం, ప్రయోగం అంతకుముందెన్నడూ, ఎక్కడా లేదు. ఉత్తమ సాహిత్యాన్ని నెలానెలా నవల రూపంలో, చౌకగా పాఠకులకు అందించాలనే ఆలోచనతో మొదలైంది ‘చతుర’ పత్రిక. ఇదీ ఒక విభిన్న ఆలోచనే. ఆ రెండు పత్రికలూ 38 ఏళ్లుగా ప్రజారంజకంగా నడుస్తూనే ఉన్నాయి.
      రామోజీరావు నిర్మించిన సినిమాలూ చరిత్ర సృష్టించాయి. బడ్జెట్‌ వేలంవెర్రిలో కొట్టుకుపోకుండా తక్కువ ఖర్చుతో సినిమాలు నిర్మించడం ఆయనకు అలవాటు. జన సామాన్యంలో జరిగే సంఘటనల్నే కథావస్తువులుగా స్వీకరించారు. మౌనపోరాటం, ప్రతిఘటన, మయూరి, పీపుల్స్‌ ఎన్‌కౌంటర్‌, అశ్విని సినిమాలు అలాంటివే. ఇవన్నీ మంచి సినిమాలుగా గుర్తింపు పొందడమే కాక, ఆర్థికంగా గొప్ప విజయాలు సాధించాయి. ఉషాకిరణ్‌ మూవీస్‌ పతాకంపై ఆయన నిర్మించిన సినిమాల ద్వారా ఎంతోమంది నటీనటులు, దర్శకులు వెండితెరకు పరిచమయ్యారు. జైపూర్‌ చెక్క కాలితో నాట్యం చేసే సుధాచంద్రన్‌ని, పరుగుల రాణి అశ్విని నాచప్పని కథానాయికలుగా; కీరవాణిని, ఎస్‌.జానకిని సంగీత దర్శకులుగా; జూనియర్‌ ఎన్టీఆర్‌, శ్రియలాంటి ఎంతోమందిని తారలుగా మలచిన ఘనత ఆయనదే. 30 ఏళ్లలో ఆయన తెలుగు తెరపై చెరగని ముద్ర వేశారు.
      ఈటీవీ ద్వారా ఎంతో మంది కళాకారులు, సాంకేతిక నిపుణులు, దర్శకులు వెలుగులోకి వచ్చారు. ‘పాడుతా తీయగా’ కార్యక్రమం ఆణిముత్యాల్లాంటి వందల మంది గాయనీ గాయకులను ప్రపంచానికి అందించింది. ‘తెలుగువెలుగు’ ఎందరో భాషావేత్తలకు, రచయితలకు, కవులకు అత్యుత్తమ వేదికగా, తెలుగు భాషకి ఆలంబనగా నిలుస్తోంది. ఎందరో జాతిరత్నాల్ని ‘మార్గదర్శి’ ద్వారా పరిచయం చేస్తూ ఈటీవీ దేశభక్తినీ, సమాజ సేవనూ పెంపొందిస్తోంది. అన్నదాత, జైకిసాన్‌ కార్యక్రమాలు రైతులకు చేస్తోన్న మేలు అంతా ఇంతా కాదు. దృశ్యమాధ్యమం కావడం వల్ల ఈ కార్యక్రమాలు వ్యవసాయదారులపై ఎంతో ప్రభావాన్ని చూపిస్తున్నాయి.
సమయ పాలకుడు
రామోజీరావు క్రమశిక్షణకి మారుపేరు. సూర్యుణ్ని ఆరాధించే ఆయన నిర్విరామంగా పనిచేస్తారు. తెల్లవారుజామున మూడు గంటలకే ఆయన దినచర్య మొదలవుతుంది. సూర్యోదయానికి ముందే ముఖ్యమైన దినపత్రికలు చదివేస్తారు. ఉదయం నడక ఆయనకు ప్రాణ సమానం. తన సంస్థలపై లక్షలమంది ఆధారపడినందున వారి శ్రేయస్సూ, భవిష్యత్తూ తన ఆరోగ్యంపై ఆధారపడి ఉన్నాయని నమ్ముతారు. తను క్రమశిక్షణగా ఉంటూ ఇతరులను క్రమశిక్షణతో నడిపిస్తారు. దేన్ని చేపట్టినా నిశితమైన ఆలోచన, లోతైన అధ్యయనం, ప్రణాళికాబద్ధమైన కృషి ఆయనకు అలవాటు.
      ఎనభయ్యో పడిలో పడినా ఆయనలో దీక్షాదక్షతలు ఏమాత్రం తగ్గలేదు. ఈ వయసులో ఎవరైనా విశ్రాంతి కోరుకుంటారు. రామోజీరావు మాత్రం పనిలోనే విశ్రాంతి అంటారు. కాలంతో పోటీపడి పనిచేస్తారు. సమయపాలన కచ్చితంగా పాటిస్తారు. ఆరునూరైనా ఉదయం పది గంటలకు ఆఫీసులో ఉంటారు. సమావేశాలకు ఒక్క నిమిషం కూడా ఆలస్యం కారు. అపాయింట్‌మెంట్‌ ఇస్తే కచ్చితంగా ఆ సమయానికి అందుబాటులో ఉంటారు. అందుకే అంటారు కాబోలు... వృద్ధాప్యం అంటే వయసు పైబడటం కాదు, నేర్చుకోవడం ఆగిపోవడమని.
సాహసికుడు
రామోజీరావు పట్టిందల్లా బంగారం అంటుంటారు. పట్టింది బంగారం చేయడం కోసం ఆయన చేసే కృషి, పట్టుదల చాలామందికి తెలియవు. పని నుంచి ఆయన దృష్టిని మళ్లించే ఆకర్షణ ఏదీ ఈ భూమ్మీద లేదు. ధైర్యవంతుల్నే విజయం వరిస్తుందంటారు. ఆయనలోని ధైర్యసాహసాలు మరొకరు అనుకరించాలన్నా సాధ్యం కానివి. ఆత్మగౌరవం విషయంలో ఆయనది రాజీలేని ధోరణి. చేయని తప్పుకి శిక్ష విధించాలని శాసనమండలి హుకుం జారీ చేసినప్పుడు ఆయన శిరసు వంచలేదు.
      గృహిణులు పెట్టుకునే పచ్చళ్లని పరిశ్రమగా ప్రారంభించి, కార్పొరేట్‌ స్థాయికి తీసుకెళ్లినా, పరస్పర విశ్వాసమే ఆలంబనగా నడిచే చిట్‌ఫండ్‌ వ్యాపారంతో వేల కోట్ల టర్నోవర్‌ సాధించినా ఆయన దూరదృష్టి, కార్యదీక్షలే కారణాలు. ఆయనది సవాళ్లని అవకాశాలుగా మార్చుకొనే స్వభావం. సవాళ్లు లేని జీవితం ఆయనకు నిస్సారం.
      రామోజీరావు తమ సంస్థల్లోని నియమనిబంధనల్ని తు.చ. తప్పకుండా పాటిస్తారు. ప్రజలకు సంబంధించిన సమాచారమే వార్తాంశం కావాలని ఆయన నియమం. తన మాతృమూర్తి మరణం కూడా ఈనాడులో వార్తగా రావడానికి అంగీకరించలేదు. ఇతర పత్రికల ద్వారానే ఆ వార్త లోకానికి తెలిసింది. 1962లో ప్రారంభించిన మార్గదర్శి చిట్‌ఫండ్స్‌లో హామీపత్రం ఇవ్వకుండా డబ్బు చెల్లించండని యాభై ఏళ్లలో ఇంతవరకు ఒక్కరికీ సిఫారసు చేయలేదంటే ఆయన పద్ధతుల్ని సులభంగా అర్థం చేసుకోవచ్చు. రామోజీ గ్రూపులో దశాబ్దాలుగా నెలాఖరు రోజునే విధిగా జీతాలివ్వడం, పదవీ విరమణ రోజునే సంస్థాగతమైన చెల్లింపులు చేయడం ఆయన పట్ల నమ్మకాన్ని పెంచాయి. ఏ సంస్థ మనుగడకైనా ఇలాంటి ప్రమాణాలే శ్రీరామరక్ష.
      ఈనాడు సహాయ నిధి ద్వారా కోట్ల రూపాయలు వెచ్చించి దేశవ్యాప్తంగా ఎన్నో శాశ్వత నిర్మాణాలు చేపట్టారు. ఆంధ్రప్రదేశ్‌, తెలంగాణ, ఒడిశా, తమిళనాడు, గుజరాత్‌ రాష్ట్రాల్లో ఇళ్లు, బడులు, తుపాను రక్షిత భవనాలు నిర్మించారు. శ్రమదానోద్యమం, సుజలాం-సుఫలాం ద్వారా ఎన్నో ప్రజాహిత కార్యక్రమాలు చేపట్టారు.
      రామోజీరావు జీవితంలో శిఖర సమానమైనది 1984 నాటి ప్రజాస్వామ్య పునరుద్ధరణోద్యమం. తెలుగుదేశం పార్టీని నిలువునా చీల్చి ఏడాదిన్నర ప్రాయంలోనే ఎన్టీరామారావు ప్రభుత్వాన్ని కూల్చేసినప్పుడు ఈనాడు దినపత్రిక విశ్వరూపం చూపింది. తెలుగునాడు యావత్తూ భగ్గుమంది. దేశం మొత్తానికి నెల రోజులపాటు ఈ అంశమే కేంద్ర బిందువు అయింది. రాజకీయ పక్షాలకు, మేధావులకు, న్యాయకోవిదులకు ఇదే వార్తాంశం. శక్తిమంతురాలైన నాటి ప్రధాని ఇందిరాగాంధీ నెల రోజులు తిరక్కుండానే ఎన్టీరామారావు ప్రభుత్వాన్ని పునః ప్రతిష్ఠించవలసి వచ్చింది. దేశంలోనే అదొక అపూర్వ ఘట్టం. రామోజీరావు పేరు దేశవ్యాప్తంగా మార్మోగిపోయింది.
విశ్వసనీయుడు
రామోజీరావుకి ఎన్నో పురస్కారాలు లభించాయి. ఆంధ్ర, శ్రీ వెంకటేశ్వర, శ్రీశ్రీ రవిశంకర్‌ విశ్వవిద్యాలయాలు డాక్టరేట్లతో గౌరవించాయి. ప్రతిష్ఠాత్మక యుధ్‌వీర్‌, కెప్టెన్‌ దుర్గాప్రసాద్‌ చౌదురి (రాజస్థాన్‌) బి.డి.గోయంకా వంటి అనేక అవార్డులు లభించాయి. ప్రజలు అంతకంటే పెద్ద అవార్డులు, రివార్డులే ఇచ్చారు. రాజ్యాధికారాన్ని అడ్డం పెట్టుకుని ప్రభుత్వ పెద్దలు ఆయన్ని చక్రబంధంలో ఇరికించాలని చూసినప్పుడు లక్షలమంది ప్రజలే రక్షాకవచమై నిలిచారు. జనానికి ఏమాత్రం అనుమానం కలిగినా ప్రభుత్వరంగ సంస్థలే మనుగడ సాగించలేవు. ప్రభుత్వ పెద్దలే అపోహల్ని, పుకార్లని సృష్టించి, ఆందోళనలను ఎగదోసినప్పుడు ప్రజలు ఆయన పట్ల పరిపూర్ణమైన నమ్మకాన్ని కలిగి ఉండటం భారతదేశ చరిత్రలోనే అద్వితీయం. మార్గదర్శి ఉదంతం విశ్వసనీయతకి గొప్ప ఉదాహరణ.
      ఇప్పుడు రామోజీరావు దృష్టి అంతా ‘ఓం’ నగర నిర్మాణం, ‘రామోజీ మల్టీమీడియా’లపైనే. దేశంలోని 108 ప్రసిద్ధ హిందూ దేవాలయాలు ఓం నగరం పేరుతో ఒకేచోట నిర్మించ తలపెట్టారు. ఈ ప్రాజెక్టు పూర్తయ్యాక ఇది కచ్చితంగా ప్రపంచ వింత అవుతుంది. ప్రధాన భారతీయ భాషలన్నింటిలోనూ టెలివిజన్‌ ఛానళ్లనూ, మేగజైన్లనూ, అంతర్జాల పత్రికలనూ ఆవిష్కరించడం రామోజీ మల్టీమీడియా లక్ష్యం. ప్రగతి ప్రస్థానం ఎప్పుడూ, ఎక్కడా ఆగకూడదు.. ఆగితే ముగిసినట్లేనని రామోజీరావు భావన. ఆయనకి విజయం ఒక గమ్యం కాదు, అదొక నిరంతర యాత్ర.

* * *

      వెనక్కి తిరిగి చూసుకుంటే సంతృప్తి లేని జీవితం వృథా అని నమ్మే ఆయనకు... ఎనిమిది పదుల ప్రయాణంలో ఎన్ని విజయపరంపరలో!! ఎన్నెన్ని మధురఘట్టాలో!!!

*  *  *

 


వెనక్కి ...

మీ అభిప్రాయం